முகமூடி

4. எது திரைப்படம், எது வாழ்க்கை? எது நிழல் எது நிசம்? என்றெல்லாம் பகுத்துணர தெரியாத அறிவுகெட்ட கூமுட்டைகளான இளைஞர்களை அரசியல்வாதிகள் வெட்டியாக பயன்படுத்துகிறார்களே, நாமும் அவர்களை வெறுமனே விசிலடிச்சான் குஞ்சுகளாக மட்டும் வைத்துக்கொள்வோம் என்று எண்ணாமல் கலைஞர்கள் அதிலும் வெகுசன ஊடகமான திரைப்பட நடிகர்கள் தமக்கு மற்றவர்களைவிட அதிகம் சமூகப்பொறுப்புணர்விருக்கின்றதா?? என்று தினமும் காலை ஒருமுறை மாலை ஒரு முறை கேட்டுக்கொள்ள வேண்டும் (சட்டம் 89ஆ)

5. உலக நாகரீக இயக்கம் எடுத்த புள்ளிவிவரப்படி இளைஞர்கள் பெண்களை பார்த்து ஜொள்ளு விடுவதில் உலக அளவில் தமிழ்நாடுதான் முன்ணனியில் இருக்கிறது. இதற்கு காரணம் சினிமாவில் பெண்களை காண்பிப்பதுதான் என்றும் அந்த பு.வி சொல்கிறது... ஆகவே இனி இளைஞர்கள் சமுதாயம் சீர்திருந்தும் வகையில் பெண்களை திரையில் காண்பிக்கவே கூடாது. (சட்டம் 13.அ) கதாநாயகி இல்லாமல் வருமாறு கதை எழுத எழுத்தாளர்கள் கற்றுக்கொள்ள வேண்டும். தேவைப்படின் பெண் கதாபாத்திரத்துக்கு ஆண்கள் மாறுவேஷம் போட்டு நடிப்பதில் ஆட்சேபணை இல்லை. ஆனால் அப்படிப்பட்ட படங்களுக்கு A சர்டிபிகேட் வழங்கப்படும்.

6. ஆண் கதாபாத்திரம் என்றாலும் பெண் வேஷத்தில் இருப்பதால் கழுத்துக்கு மேலும், கை மணிக்கட்டின் கீழும், கால் பாதம் மட்டும் தெரியும்படி மட்டுமே உடை அலங்காரம் இருக்க வேண்டும். இடுப்பு காண்பிக்கவே கூடாது... தப்பி தவறி அந்த வேஷத்தை பார்த்தே யாராவது இளைஞர்கள் உணர்ச்சி வசப்படலாம் என்பதால் "இது ஆண், பெண் அல்ல" என்று கொட்டை எழுத்துக்களில் படம் முழுக்க திரையில் தோன்ற வேண்டும் (சட்டம் 13.ஆ)

#  15 கருத்துக்கள் இதுவரை... உங்க கருத்து ??

இந்த மீள்பதிவுக்கு முந்தைய::

இந்திய கடற்கறையை வடக்கில் கொண்டிருக்கும் இலங்கை, இந்திய பெருங்கடலில் இருக்கும் இடம் வியூக முக்கியத்துவம் வாய்ந்தது. கிழக்கில் ஆஸ்திரேலியா வரையும், மேற்கே கிழக்காப்பிரிக்கா வரையும், தெற்கே அன்டார்டிகா வரையும் திறந்த வெளி கடற்பரப்புதான். எண்ணெய் வள மத்திய கிழக்கு நாடுகளை பிற ஆசிய நாடுகளுடன் இணைக்கும் அதிமுக்கிய கடற்பாட்டையில் இருக்கும் இலங்கையின் கேந்திர முக்கியத்துவம் எல்லாருக்கும் தெரிந்ததுதான்.

உள்முகம் வெளிமுகம் என்று இரண்டு அமைப்பாக அமைந்திருக்கும் திரிகோணமலை துறைமுகம் உலகத்தின் மிகச்சிறந்த இயற்கை துறைமுகங்களில் ஒன்று. மூன்று பக்கமும் நிலத்தால் சூழப்பட்ட இதன் உள் துறைமுகத்தின் மிக அதிக ஆழம் காரணமாக எவ்வளவு பெரிய கப்பலையும் அதனால கையாள முடியும். நீர்முழுகி கப்பல்கள் உள்ளே சென்று பதுங்கினால் கண்டுபிடிக்க இயலாது.இரண்டாம் உலகப்போரின் போது சிங்கப்பூரில் இருந்த பிரிட்டிஷ் கடற்தளம் ஜப்பானின் ஆக்ரமிப்புக்கு போன பின் இங்கே பிரிட்டிஷ் அரசு அமைத்திருந்த கடற்படை தளம்தான் கூட்டுப்படையினரின் தென்கிழக்காசிய தலைமையகம் ஆனது. இங்கிருந்த வான் நிலையத்திலிருந்துதான் அமெரிக்க வான்படை மியான்மர் மற்றும் மலேயாவில் ஆக்ரமித்திருந்த ஜப்பானின் மேல் குண்டு பொழிந்தது. ஜப்பானும் திரிகோணமலை மேல் குண்டு வீசியது. 1957ல் இந்த துறைமுகத்தை இலங்கை அரசு கையகப்படுத்திக்கொள்ளும் வரை வரை பிரிட்டிஷ் அரசின் கடற்படைத்தளம் இங்கு இருந்தது. (அப்பொழுது கட்டப்பட்ட 99எண்ணெய் சேமிப்புக்கிடங்குகள் - ஒவ்வொன்றும் 15000 டன் எண்ணெய் சேமிக்க கூடியவை - இப்பொழுது இந்திய இலங்கை கூட்டு வர்த்தகத்தில் தனி முக்கியத்துவம் பெற்றது)

1951ல் இலங்கை அமெரிக்கவுடன் ஒரு ஒப்பந்தம் போட்டது. அமெரிக்கா தரும் புதிய ஒளிபரப்பு சாதனங்களுக்கு பதிலாக வாய்ஸ் ஆப் அமெரிக்கா (VOA) நிகழ்ச்சிகளை ரேடியோ சிலோன் (இந்தியாவிலும் அப்போது பிரபலம்) மூலம் ஒளிபரப்புவதுதான் அது. இதன் மூலம் ஆசியா முழுமைக்கும் தன்னுடைய செய்திகளை அமெரிக்கா பரப்பி வருகிறது (இன்றைய மாடர்ன் போர்முறையில் மிக முக்கியமாக ராணுவ நிபுணர்கள் கருதுவது தகவல் தொடர்பைத்தான்)

திரிகோணமலை துறைமுகத்தையும் அமெரிக்கா தன்னுடைய ராணுவ படைகளை deploy செய்யும் கேந்திரமாக பயன்படுத்துவதற்கு முயற்சி செய்தே வந்திருக்கிறது. இங்கேயிருந்தால் சீனாவிற்கு செல்லும் மத்தியகிழக்கின் எண்ணெய் வளத்தை கண்காணிக்கவும் அதன்மூலம் சீனா மேல் ஒரு கண் வைத்திருக்கலாம் என்பது அதன் எண்ணம். உலகம் முழுவதும் தனது விரைந்து தாக்கும் திறனை மேம்படுத்துவதற்கான தளம் தேடும் (base for rapid deployment) முயற்சியில் இறங்கி இருக்கும் அமெரிக்காவுக்கு திரிகோணமலை ஒரு கேந்திர முக்கியத்துவம் வாய்ந்த பகுதி... சுனாமி மீட்புக்கு கூட USS Hercules என்ற விமானந்தாங்கி கப்பலில் ஆயுதம் தாங்கிய வீரர்களை அனுப்பும் அமெரிக்கா இப்போது பல இடங்களில் இஸ்லாமிய தீவிரவாதத்திற்கு எதிரான தாக்குதல் என்ற பேரில் - முன்பு தனக்கு அனுமதியே இல்லாத பல இடங்களில் கூட சுலபமாக - ராணுவ கேந்திரங்களை நிறுவி வருகிறது.

பொறுமையாக 1954 வாக்கில் இந்தியா இலங்கையின் விவகாரங்களை பார்க்க ஆரம்பித்தது. இலங்கை இந்தியாவின் ராணுவ பாதுகாப்பு வளையத்தின் மிக அருகில் இருப்பது, இந்திய பெருங்கடலின் கடற்பாதுகாப்பு எல்லையிலும் இருப்பது ஆகிய காரணங்களினால் அந்நிய நாடுகளின் விமான கேந்திரம் அல்லது கடற்தளம் திரிகோணமலையை கட்டுபடுத்த ஆரம்பித்தால் இந்திய நாட்டின் வான் மற்றும் கடல் தளங்களுக்கு ஏற்படும் பின்விளைவுகளை நினைத்து கவலை கொள்ள ஆரம்பித்தது.இந்தியா தன்னை சுற்றிலும் எதிரிகளை வைத்துள்ளது. தன் இடத்தை ஆக்ரமித்த சீனாவிற்கு பங்களாதேஷ், நேபாளம், பாகிஸ்தான் ஆகியவை நண்பர்கள். அமெரிக்காவும் பரம வைரியான பாகிஸ்தானும் கூட்டாளிகள். இந்தியாவிற்கோ அமெரிக்காவின் எதிரியான ரஷ்யாவுடன் நட்பு.

இந்தியாவிற்கு ஜெயவர்த்தனே அரசு மேற்கத்திய நாடுகளுடன் கூட்டு சேருமோ என்ற கவலை இருந்தது.. 1983 கலவரத்துக்கு பின் இந்தியாவின் தமிழ் போராளிகள் ஆதரவு நிலையால் ஜெயவர்த்தனே அமெரிக்க அரசின் ஆதரவை நோக்கி செல்கிறாரோ என்று எண்ணும்படியான செயல்கள் நடந்தன. போததற்கு ஜெயவர்த்தனே பிரிட்டன் பிரதமர் தாட்சருக்கு '1947ல்ஏற்படுத்திய ஒப்பந்தம் - திரிகோணமலை துறைமுகத்தை பிரிட்டன் உபயோகப்படுத்தும் என்ற - இப்போதும் செல்லும், இன்னும் காலாவதியாகவில்லை' என்று செய்தி வேறு அனுப்பினார். இந்தியாவுக்கு இலங்கையில் இயங்கும் VOA பற்றியும் சந்தேகம் உண்டு.தன்னுடைய தகவல் பரிமாற்றத்தை கண்காணிக்கவும் தன் நீர்முழுகிகளுக்கு சமிஞ்சை அனுப்பவும் அமெரிக்கா VOA சாதனங்களை உபயோகிக்கிறது என்று நினைத்தது அது.

இவ்வளவு விஷயங்களின் பின்னணியில் 1987ல் ஏற்படுத்திக்கொண்ட உடன்பாட்டில் பின் இணைப்பாக ஜெயவர்த்தனேவுக்கும் ராஜீவ் காந்திக்கும் இடையில் நடந்த கடிதப்போக்குவரத்து மூலம் சேர்க்கப்பட்ட சில விஷயங்களை பார்க்க வேண்டும்.

அ) இந்திய நலனுக்கு குந்தகம் விளையும் என்பதால் திரிகோணமலையோ அல்லது வேறு எந்த துறைமுகமோ எந்த அயல்நாட்டின் ராணுவ உபயோகத்துக்கும் தரப்படக்கூடாது (சென்ற முறை இந்தியா வந்தபோது ரணில் திரிகோணமலையை துறைமுகத்தை அந்நிய ராணுவ பயன்பாட்டுக்கு அனுமதிக்கும் எண்ணம் எதுவும் இல்லை என்று உறுதியளித்தார். சுனாமி பாதிப்பின் பிறகு திரிகோணமலை மற்றும் கொழும்பு துறைமுகங்களை சுத்தப்படுத்தி வழி ஏற்படுத்தும் முயற்சியை எல்லாருக்கும் முன் இந்தியா செய்தது)

ஆ) திரிகோணமலை எண்ணெய் சேமிப்புக்கிடங்கு புனரமைப்பும், செயல்பாடும் இந்திய-இலங்கை கூட்டு முயற்சியில் நடைபெறும் (இந்த கிடங்குகளை இந்திய அரசாங்கத்திற்கு - IOCக்கு - குத்தகைக்கு விடுவதற்கு இலங்கை அரசுக்கு இருக்கும் உரிமை பற்றி புலிகள் தங்கள் ஈழம் நேஷன் வலைத்தளத்தில் கேள்வி எழுப்பி உள்ளார்கள்)

இ) வெளிநாட்டு வர்த்தக வானொலி ஒளிபரப்பு நிலையங்கள் இலங்கை அரசுடன் வைத்திருக்கும் ஒப்பந்தங்கள் மறுஆய்வு செய்யப்பட வேண்டும். இந்த நிலையங்கள் பொது ஒளிபரப்பு அன்றி ராணுவ செய்திகளையோ ரகசிய செய்திகளையோ பரிமாற உதவியாக இருக்கக்கூடாது.

இந்த ஒப்பந்த இணைப்பு வாசகங்களை இலங்கை மீறாமல் இருப்பது இன்றும்/என்றும் இந்தியாவுக்கு அதிமுக்கியத்துவம் வாய்ந்த விஷயம்.

1962ல் க்யூபாவில் தன்னுடைய ஏவுகணைகளை நிறுவ ரஷ்யா (அப்போது யு.எஸ்.எஸ்.ஆர்) முயற்சித்த போது அதை கடுமையாக எதிர்த்தது அமெரிக்கா. அணுஆயுத போரின் விளிம்பு வரை அழைத்து சென்ற அந்த 13நாள்நாடகத்தை உலகமே கவலையாக பார்த்தது. எல்லா வகையிலும் ரஷ்யாவிற்கு நெருக்கடி கொடுத்தது அமெரிக்கா. ரஷ்யா எதையும் கண்டுகொள்ளவில்லை. திறை மறைவில் நடந்த ரகசிய பேச்சு வார்த்தையில் தன் நட்பு நாடான துருக்கியில் நிலை கொண்டிருக்கும் தன்னுடைய ஏவுகணைகளை காலப்போக்கில் திருப்பி எடுத்துக்கொள்வதாகவும், க்யூபாவின் மேல் எந்த காலத்திலும் படை எடுக்க மாட்டோம் என்றும் - கென்னடியின் தம்பியே ரஷ்ய தூதரை நேரில் கண்டு - உறுதி அளித்ததன் பேரில் ரஷ்யா தன் ஏவுகணை கட்டமைப்பை கலைத்துக்கொண்டது. உலகின் மற்ற எந்த நாட்டை விடவும் மிக அதிக அளவில் அணு ஆயுதம் மட்டுமன்றி மற்ற எல்லாவித ஆயுதங்களையும் குவித்து வைத்திருந்த அமெரிக்காவே தன்னுடைய அண்டை நாட்டில் இன்னொரு நாட்டின் ராணுவம் நிலை கொள்வதை அனுமதிக்கவில்லை. ஏன் என்பதற்கு காரணம் யோசித்தால் புரியும்.

அப்படியிருக்க இந்தியா என்னும் - 100 கோடி மக்களையும், துணைக்கண்டம் என்ற அளவில் மிகப்பெரிய நிலப்பரப்பையும், மூன்று பக்கமும் நட்பில்லாத நாடுகளையும் கொண்டிருக்கும் - நாடு தன் தேச நலன் கருதி அருகிலிருக்கும் தேசத்தை அரவணைத்து செல்ல வேண்டியது அவசியமாகிறது. ராணுவ உதவி கேட்டால் செய்ய கூடாது. பொருளாதார உதவி கேட்டால் கொடுக்கக்கூடாது (அதன் மூலமும் தளவாடங்கள் தானே வாங்கப்போகிறது) என்றால் என்ன செய்ய வேண்டும். இந்தியா உதவி செய்யாவிட்டால் இலங்கை சும்மா இருந்துவிடாது. உலக அளவில் உதவி கோரும். இலங்கைக்கு மக்களால் தேர்ந்தெடுக்கப்பட்ட ஒரு தேசம் என்ற அடையாளம் இருக்கிறது. அது பிரிவினை கோரும் - தீவிரவாத இயக்கம் என்று அமெரிக்கா, இந்தியா மற்றும் இதர நாடுகள் முத்திரை குத்திய - இயக்கத்துடன் செய்த/செய்யும் போருக்கு செலவழிக்க தளவாடங்கள் என்று கேட்டாலும் சரி, சிதைந்து போன தன் உள்கட்டுமானத்தை சரி செய்ய பொருளுதவி என்று கேட்டாலும் சரி - ஆயுதம் வழங்கவும் மற்ற உதவிகள் வழங்கவும் நிறைய நாடுகள் தயாராகவே உள்ளன. அப்படி வரும் நாடுகள் போடும் ஒப்பந்தங்கள் இலங்கைக்கு சாதகம் என்பதை விட இந்தியாவுக்கு பாதகம் என்பதுதான் என் கருத்து.

நேரம் இருந்தால் ஒரு முறை இலங்கைக்கு இந்தியா உதவி என்ற என் சென்ற பதிவை படியுங்கள்

#  32 கருத்துக்கள் இதுவரை... உங்க கருத்து ??

குறிப்பு: நான் மீள்பதிவு செய்தபோது ஒட்டு நிலவரம் (-12/24) என்ற அளவிலே இருந்தது. மீள்பதிவு செய்ததினால் reset அகிவிட்டது. ஓட்டு போட்டவர்கள் பொறுத்தறுள்க.

விடுதலைப்புலிகளின் நலன் ஒன்றை மட்டுமே விரும்பும் வைகோ இந்தியா இலங்கைக்கு எந்த ராணுவ தளவாடங்களையும் வழங்கக்கூடாது என்று இந்திய பிரதமருக்கு கடிதம் எழுதியுள்ளார். அப்படி வழங்கினால் அது இலங்கை தீவு தமிழர்கள் மட்டுமல்லாமல் இந்தியாவில் வாழும் தமிழர் இதயங்களிலும் ஆற்ற முடியாத காயங்களை ஏற்படுத்தும் என்பது அவரின் வாதம்.

இலங்கை தமிழர் நலன் என்ற தனது வழக்கமான வாசகங்களை உபயோகித்தாலும் அவர் உண்மையில் கூற நினைப்பது இந்தியா ஆயுத உதவி வழங்கினால் அது விடுதலைப்புலிகளுக்கு ஆபத்தாக முடியும் என்பதாகத்தான் இருக்க முடியும்....

விடுதலைப்புலிகள் தமிழர் நலனுக்காக போராடுவதாக பிரச்சாரம் செய்யப்பட்டாலும் உலகத்தின் பார்வையில் அது ஒரு தீவிரவாத இயக்கம் என்பது மறுக்க முடியாத உண்மை... செஷன் தீவிரவாதிகளை பற்றி எந்தளவு நாம் கவலை கொள்கிறோமோ அதே அளவுதான் விடுதலைபுலிகளை பற்றிய உலகத்தின் கவலையும்... ஆக கசப்பாக இருந்தாலும் உண்மை நிலை இதுதான் :: இலங்கை என்ற நாட்டில் மக்களால் தேர்ந்தெடுக்கப்பட்ட ஒரு அரசாங்கம் இராணுவ உதவி என்று கேட்கும்போது இந்தியா தராவிட்டால் வேறு ஏதாவது ஒரு நாடு அந்த உதவியை அளிக்க முன்வரும்... என் விளக்கம் இங்கே

அமெரிக்க அரசு ராணுவ உதவி என்று இலங்கை எதை கேட்டாலும் தர தயாராக இருக்கும்... மாற்றாக அங்கே ராணுவ தளம் குறிப்பாக கடற்படை தளம் அமைக்க அனுமதி கேட்கும்... டியகோ கார்சியா தீவில் ராணுவ தளம் ஏற்படுத்த நடந்த கூத்துக்களை மறக்கக்கூடாது. தென்கிழக்கு பிராந்திய கண்காணிப்புக்கு குறிப்பாக இந்திய நடவடிக்கைகளை கண்காணிப்பதற்கு இலங்கை ஒரு மிகச்சிறந்த பூகோள சாதக இடம்... இந்த பிராந்தியத்தில் கடற்கண்காணிப்புக்கு அமெரிக்கா தகுந்த வசதியில்லாமல் நிறைய செலவு செய்கிறது... ஏற்கனவே சுனாமி மீட்பு என்ற போர்வையில் தளம் பதிக்க சென்ற அமெரிக்க அரசுக்கு இந்தோனீஷிய அரசும் இந்திய அரசும் அனுமதி மறுத்தது... இலங்கை கட்டுப்பாட்டுடன் கூடிய அனுமதி அளித்தது...

அமெரிக்காவோ அல்லது வேறு எந்த நாடோ இலங்கையில் ராணுவ உதவி என்ற பெயரில் உள்ளே நுழைவதோ அல்லது இலங்கை ஏதோ ஒரு நாட்டிலிருந்து மிக நவீன அன்னிய தயாரிப்பு ராணுவ தளவாடங்களை வாங்குவதோ இந்தியாவின் இறையாண்மைக்கு நல்லதா என்பதை வைகோ போன்றவர்கள் சிந்திக்க வேண்டும்... பிரபாகரன் தனது நண்பர் என்ற காரணத்தால் தன் பிறந்த நாட்டின் கேட்டிற்கு வித்திடத்துணியக்கூடாது...

பி.கு: இதையும் IPKF இலங்கைக்கு சென்றதையும் முடிச்சு போட கூடாது... IPKF என்பது ஒரு கறுப்பு அத்தியாயமாக இப்போது பார்க்கப்பட்டாலும் அது அனுப்பப்பட்ட காலத்தையும் சூழ்நிலையயும் கருத்தில் கொள்ள வேண்டும்

பின்பாட்டு: வைகோவிற்கு இலங்கை தமிழர்கள் மேல் உண்மையான அக்கறை இருப்பின் அவர் இலங்கை தமிழர் நலன் குறித்து பேசியதை தவிர என்ன செய்தார் என்று யாராவது எனக்கு சொல்லுங்கள்... தன் வேரை இழந்து தன்மானத்துக்கு இழுக்கு ஏற்படும் வகையிலான ஒரு வாழ்க்கை தரத்தில், தமிழ்நாட்டு அகதிகள் முகாமில் வாழும் அம்மக்களின் வாழ்க்கை தரத்தை உயர்த்த ஏதாவது பாடுபட்டாரா?? அவர்களுக்கு எல்லாம் எந்த அளவில் உழைத்தார்... எனக்கு உண்மையிலேயே தெரியவில்லை... பேச்சளவில் வருத்தப்படுவதும் வீறு கொண்டு முழங்குவதும்தான் தமிழர் நலன் என்றால் வைகோவை விட நிறைய பேர் பல மடங்கு மேல்.

#  62 கருத்துக்கள் இதுவரை... உங்க கருத்து ??